Chapter Text
第一話 沒有
「跟住落嚟呢個獎，我只會直接講佢個名出嚟，就講一次。」
主持人打開信封，微笑著說出得獎人的名字：「盧瀚霆。」
尖叫聲山呼海嘯自四面八方傳來，盧瀚霆有點難以置信，去年的搞笑整蠱事件之後他對這個獎就有點 ptsd，左右望望想確認一下主持人還有沒有什麼要說的。
「今次應該係真㗎喇。」身邊的呂爵安伸手搭著他的膊頭，欺近他說道，「上去啦。」
盧瀚霆聽話地除掉口罩，走到通道中間，轉身向所有人深深鞠躬，然後再快步上前，接過獎座的時候還忍不住問主持人：「係咪要行返落去㗎？」
主持人也被逗笑了，留下一句“好好享受”就揮手下台。
看著台下的同行和粉絲，盧瀚霆百感交集，但是身體很自然地又再深深彎下去，姿態誠懇，起身的時候臉上掛著淡定從容的笑：「多謝叱咤，多謝投票畀我嘅每一個人，多謝出道以來幫過我提點過我嘅每一個同行以及前輩，無你哋就無今日嘅盧瀚霆，特別多謝我嘅經理人爵爺，將我從一個名不經傳嘅普通 dancer 湊到而家，雖然唔可以講有幾成功，但都可以算係獨當一面，嚟緊呢一年我保證我一定唔會偷懶，一定會盡我 2000% 去努力，去回報每一個支持我嘅人，多謝。」
呂爵安聽著自己一手捧紅的藝人發言，露出微笑，伸手鼓掌。他知道有鏡頭對著自己，無論怎樣，明天肯定會見報，內容不外是金牌冷面經理人爵爺又捧出一個未來的超級偶像云云，所以笑要淡定，舉止要得體。
是的，呂爵安，19 歲入行從藝人助理做起，因為為人聰明又有野心，僅僅用了十幾年就已經爬上金牌經理人位置，手下帶出過幾個譽滿香江的藝人，而盧瀚霆就是他目前帶的下一個潛力股，但就是這樣的呂爵安，卻讓盧瀚霆在奪得最受歡迎男歌手獎座的晚上抱著被子輾轉反側。
「跟住我咪落返台準備離場囉，佢話送我返屋企，我諗咗好耐終於鼓起勇氣同佢講“多謝爵爺一直以嚟咁照顧我，不如我搵日請你食飯吖？”」
「你知唔知佢點答啊！佢點答啊！佢話“唔駛咁客氣，我湊得你就有義務捧紅你，係我份內事嚟”然後車到我樓下就走咗喇！！！」
「你話吖呢啲人係咪無良心吖！我跟咗佢四年，佢都當我係......當我係......哎唔知點講好，真係激死，佢知唔知出面好多人候住我㗎！佢係咪盲㗎！哎～嘖～」
電話另一頭的李駿傑忍笑忍得好辛苦，唯有幫自家好友腔一起噴“渣男”：「係囉，追我哋撈撈嗰啲人排曬長龍喇，你咁正咁靚，嗰個男人同你一齊做嘢四年都可以不為所動個喎，佢係咪有咩問題啊其實。」
「你就有問題，呂爵安不知身體幾好，我無意中見過佢換衣服，有八舊腹肌㗎！」
李駿傑真是白眼反到後腦：「咁你又係咁喺度話人？嗰個男人有咩好啫，你都暗戀咗佢咁多年喇，佢都唔知個喎，不如算數喇，同我一齊落 pub 食仔咪幾好。」
盧瀚霆手腳並用抱緊枕頭，語氣認真：「唔得，我話晒都有頭有面，陣間畀人爆出嚟咪大鑊？而且我對快餐無興趣，都係呂爵安呢啲好，雖然個人平時悶啲，但係得閒就去做 gym 同游水，放假會係屋企睇書，最鍾意嘅電視節目係 national geographic，平時唔會亂洗錢，出糧就寄畀係加拿大嘅爸爸媽媽同妹妹......」
“救命......”李駿傑在心裡腹誹著好友第 101 次如數家珍地講解呂爵安日常，馬上插嘴打斷：「咁你暗戀咗佢四年都追唔到，不如試下換策略？」
「吓？即係點啊？」
「啊教主你平時個人設咁高冷，可能佢唔鍾意呢挺呢，有啲人外表冷漠其實內裡風騷，你轉下 type 走姣仔路數，如果佢對你有意思話唔定會呷醋呢？」
「work 唔 work 㗎？同埋我其實真係唔係好識姣仔喎，我無諗過走性感路線㗎。」這下盧瀚霆開始苦惱了，好友一直以來都是直男殺手，說不定他提的建議會有用？
「好簡單啫，嗱你......」
第二天盧瀚霆精神飽滿地邁上了爵爺的車，甚至笑得陽光燦爛地和對方道早晨，可惜在他的角度看起來呂爵安和平時沒什麼分別，依舊冷冷淡淡地點頭示意自己知道。
唔緊要，而家先啱啱開始，加油啊盧瀚霆！心裡這麼想著，一邊哼歌一邊攬好安全帶。
「幫你接咗一套劇，幾有挑戰性，你睇下劇本先？」呂爵安目不斜視地開著車，手指了指中控台放著的文件，盧瀚霆拿起來一看，標題“大叔的愛”四個字就讓他瞪大了眼。
「個名咁怪嘅？」
「你睇完先。」
盧瀚霆於是大略瀏覽了一下概覽和劇情，看到角色列表的時候有點驚訝：「都市愛情劇，但主角係兩個男人？」
「係啊，BL 劇，好有挑戰性，我覺得個角色好適合你，所以特登爭取返嚟畀你。我個人比較鍾意阿木呢個角色，同你平時形象反差好大，應該可以幫你再圈一大波粉，尤其係阿木嘅設定係感情裡面受傷害嗰個，就算將來炒完 cp 拆檔你都係大眾同情嗰個，唔駛驚畀人鬧。」
看著呂爵安平靜地用公事公辦的口吻交代讓自己組cp 的安排，甚至已經計畫好後招，似乎今年自己的第一個工作就是炒緋聞，盧瀚霆突然覺得心裡不是味兒。
「既然你都幫我接咗咯，我實盡力做好個角色㗎，你放心。」
感受到自家藝人語氣裡面稍微表露出來的冷淡，呂爵安的瞳孔從鏡片後往左移瞟了他一眼，然後若無其事地繼續開車。
「過兩日劇本圍讀，你呢兩日睇熟個劇本佢。」
「知㗎喇。」
《大叔的愛》其實在創作階段就已經基本敲定了卡司，主創團隊沒想到聯繫的兩個主演幾乎沒有考慮多久就答應了，整個團隊都沉浸在自家作品即將走紅全香港的喜悅裡面。
男主角之一阿甜是由最近炙手可熱的 360 度無死角少女收割機魏浚笙飾演，而另一個男主角阿木則是剛奪得了最受歡迎男歌手的盧瀚霆，光是兩個主演就讓在場的女工作人員們彷彿打了雞血，呂爵安剛踏入片場就已經感受到整個劇組不同平常的興奮，心裡甚至懷疑是否集體嗑藥。
盧瀚霆戴著白色針織漁夫帽，前髮壓得遮眼，像個乖寶寶一樣跟在呂爵安身後逐一和工作人員打招呼，來到化妝間更是被造型團隊姐姐們圍住嘖嘖稱嘆，一時讚皮膚好一時讚身材好，整個定妝過程鶯燕環繞，十分熱鬧。
待呂爵安用手機處理了幾件不太緊急的事務之後那邊終於定妝完畢，就見盧瀚霆站起來走向自己展示造型。
「登登登凳～好唔好睇啊？」盧瀚霆笑得彎起了腰果眼，「啲姐姐個個都讚我著西裝好好睇啊！」
和以往的齊陰髮型不一樣，這次為了飾演職場人士，髮型師給盧瀚霆設計了一個中分頭造型，分界兩邊的前髮特地弄成有點向內彎曲的心型，顯得年輕又朝氣蓬勃。
「係幾好，」呂爵安看著面前的人，依舊面目表情，「個髮型唔錯，最好染埋黑色，可以 keep 住今年做形象主打，最近幫你安排多啲時間做 gym 練厚啲個背到時候出嚟效果應該更加好，你都係時候要轉型，練大隻啲著衫會更 charm。」
依舊是專業點評，聽得盧瀚霆猶如兜頭被淋了一盆冷水。這是自己第一次在呂爵安面前穿全套西裝，比起平時日常打扮就很正式的呂爵安自己確實穿得沒有他好看——黑色窄條紋西褲，白色恤衫，衫袖整齊地摺到手肘，露出戴著鋼製手錶的小麥色手臂，而手臂這個“絕對領域”盧瀚霆常常偷偷地看。
稍微扯了扯嘴角正打算說什麼，突然一道聲音從門口傳來：
「喂anson，好耐無見喇！」
一身休閒打扮的魏浚笙出現在化妝間門口，然後張開雙手直接走過來抱住了盧瀚霆。
呂爵安幾不可見地皺了皺眉。
然而盧瀚霆沒有留意到呂爵安細微的表情變化，開開心心地回抱魏浚笙：「哇無見一排做乜你又靚仔咁多㗎，睇過～」
二人自去年一個綜藝上搭檔過之後就沒什麼機會見面，於是一聚頭便嘰嘰喳喳聊個不停，呂爵安知道他們以前是同一個大學社團的師兄弟關係，所以感情較普通同行朋友更好。
「不如睇下你個 look點吖，」盧瀚霆開心地提議要陪著魏浚笙做造型，「橫掂我而家都無嘢做。」眾造型師更是被燃起了腐女之魂不斷拿手機拍視頻起哄，這時候呂爵安開口叫住了盧瀚霆：
「anson，你過一過嚟先。」
不出意外被團團圍住的盧瀚霆身邊馬上出現了陣陣哀嚎，他安撫了大家之後小跑到呂爵安身邊，之前的不高興已經被重遇魏浚笙的開心取代，笑意直達眼底，「咩事啊爵爺？」
「唔好掛住睇人哋住先，你睇下個 list，聽日第一場就要拍呢個場口，你準備好未？」
盧瀚霆見狀湊過去一看，雖然說影視製作一般會打亂原有劇本時間線拍攝，但是他沒想到自己擔正主角拍的第一個鏡頭是吻戲，而且還是他強吻魏浚笙。
呂爵安知道盧瀚霆明白了自己的意思，正想說什麼，卻見他毫無防範意識地越湊越近，側臉差點要貼上自己的唇，甜膩的玫瑰花香縈繞在鼻端，連忙把手裡的 a4 紙塞到對方手裡，然後退開。
「嘩之後仲要係分手戲，啲感情轉換都幾快喎。」盧瀚霆已經完全沉浸在白紙黑字裡，腦裡剩下對自己演技的擔憂，「死喇我搞唔搞得掂㗎......」
咬咬手指，靈機一動，他一臉諂笑看向呂爵安：「爵爺，不如你搵時間同我對一下戲吖？」
呂爵安沒想到他會這麼說，稍微思考了一下，然後說：「可以，你今晚過嚟我 office 等，橫掂等下要影宣傳相，我過去 melody嗰邊望下先。」